Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā saraṇagamaniyo thero imā gāthāyo abhāsitthāti. Saraṇagamaniyattherassāpadānaṁ tatiyaṁ. Tiṇadāyakavagga Abbhañjanadāyakattheraapadāna “Nagare bandhumatiyā, rājuyyāne vasāmahaṁ; Cammavāsī tadā āsiṁ, kamaṇḍaludharo ahaṁ. Addasaṁ vimalaṁ buddhaṁ, sayambhuṁ aparājitaṁ; Padhānaṁ pahitattaṁ taṁ, jhāyiṁ jhānarataṁ vasiṁ. Sabbakāmasamiddhiñca, oghatiṇṇamanāsavaṁ; Disvā pasanno sumano, abbhañjanamadāsahaṁ. Ekanavutito kappe, yaṁ dānamadadiṁ tadā; Duggatiṁ nābhijānāmi, abbhañjanassidaṁ phalaṁ. Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”.