เตน กมฺมาวเสเสน ปญฺจ ชาติสตานิหํ

มนุสฺโส กุลโช หุตฺวา ปาฏิยา ๑ ลกฺขณงฺกิโต ฯ

ปญฺจ ชาติสตาเนว กุฏฺฐโรคสมปฺปิโต

มหาทุกฺขํ อนุภวึ ตสฺส กมฺมสฺส วาหสา ฯ

อิมมฺหิ ภทฺทเก กปฺเป อุปริฏฺฐํ ๒ ยสสฺสินํ

ปิณฺฑปาเตน ตปฺเปสึ ปสนฺนมานโส อหํ ฯ

เตน กมฺมวิเสเสน เจตนาปณิธีหิ จ

ชหิตฺวา มานุสํ เทหํ ตาวตึสํ อคญฺฉหํ ฯ

ปจฺฉิเม ภวสมฺปตฺเต อชายึ ชตฺติเย กุเล

ปิตุโน อจฺจเยนาหํ มหารชฺชสมปฺปิโต ฯ

กุฏฺฐโรคาภิภูโตหํ รตฺติยํ ๓ น สุขํ ลเภ

โมฆํ รชฺชสุขํ ยสฺมา โมโฆ ราชา ตโต อหํ ฯ

กายสฺส โทสํ ทิสฺวาน ปพฺพชึ อนคาริยํ

พาวริสฺส ทิชคฺคสฺส สิสฺสตฺตํ อชฺฌุปาคมึ ฯ

มหตา ปริวาเรน อุเปจฺจ นรนายกํ

อปุจฺฉึ นิปุณํ ปญฺหํ วาคิสํ ๔ วาทิสูทนํ ฯ

อยํ โลโก ปโร โลโก พฺรหฺมโลโก สเทวโก

ทิฏฺฐินฺเต ๕ นาภิชานามิ โคตมสฺส ยสสฺสิโน ฯ

เอวํ อภิกฺกนฺตทสฺสาวึ อตฺถี ปเญฺหน อาคมํ

กถํ โลกํ อเวกฺขนฺตํ มจฺจุราชา น ปสฺสติ ฯ #๑ ม. ชาติยา ฯ ยุ. ตติยา กรณงฺกิโต ฯ ๒ ยุ. อุปติฏฺฐํ ฯ ๓ ม. น รตึ ... ฯ #๔ ม. ตํ วีรํ ... ฯ ๕ ม. ยุ. ทิฏฺฐึ โน ... ฯ