นายกานํ วโร สตฺถา คุณาคุณวิทู ชิโน

กตญฺญูกตเวที จ ติตฺเถ โยเชติ ปาณิโน ฯ

สพฺพญฺญู เตน ญาเณน ตุลยิตฺวา ทยาสโย

เทเสติ ปวรํ ธมฺมํ อนนฺตคุณสญฺจโย ฯ

ส กทาจิ มหาวีโร อนนฺตชนตํ สุธี

เทเสติ มธุรํ ธมฺมํ จตุสจฺจูปสญฺหิตํ ฯ

สุตฺวาน ตํ ธมฺมวรํ อาทิมชฺฌนฺตโสภนํ

ปาณสตสหสฺสานํ ธมฺมาภิสมโย อหุ ฯ

นินฺนาทิตา ตทา ภูมิ คชฺชึสุ จ ปโยธรา

สาธุการํ ปวตฺตึสุ เทวพฺรหฺมนราสุรา ฯ

อโห การุณิโก สตฺถา อโห สทฺธมฺมเทสนา

อโห ภวสมุทฺทสฺมึ นิมุคฺเค อุทฺธริ ชิโน ฯ

เอวํ ๑ สํเวคชาเตสุ สนรามรพฺรเหฺมสุ

กุลปฺปสาทกานคฺคํ สาวกํ วณฺณยิ ชิโน ฯ

ตทาหํ หํสวติยา ชาโตมจฺจกุเล อหุ

ปาสาทิโก ทสฺสนีโย ปหูตธนธญฺญวา ฯ

หํสารามมุเปจฺจาหํ วนฺทิตฺวา ตํ ตถาคตํ

สุณิตฺวา มธุรํ ธมฺมํ การํ กตฺวา จ ตาทิโน ฯ

นิปจฺจ ปาทมูเลหํ อิมํ วจนมพฺรวึ

กุลปฺปสาทกานคฺโค โย ตว สาสเน มุเน ๒ ฯ #๑ ม. ปเวทชาเตสุ ฯ ๒ ม. ยุ. โย ตยา สนฺถุโต มุเน ฯ