วิสฺสฏฺโฐ โหหิ มา ภายิ ลทฺโธ โชติรโส ตยา

ยํ ตุยฺหํ ปตฺถิตํ สพฺพํ ปริปูเรสฺสตาสนํ ๑ ฯ

น ๒ โถกํ สุกตํ ปุญฺญํ ปุญฺญกฺเขตฺเต อนุตฺตเร

สกฺกา อุทฺธริตุํ อตฺตา ยสฺส จิตฺตํ สุนีหิตํ ๓ ฯ

อิมินา อาสนทาเนน เจตนาปณิธีหิ จ

กปฺปสตสหสฺสานิ วินิปาตํ น คจฺฉติ ฯ

ปญฺญาสกฺขตฺตุํ เทวินฺโท เทวรชฺชํ กริสฺสติ

อสีติกฺขตฺตุํ ราชา จ จกฺกวตฺติ ภวิสฺสติ ฯ

ปเทสรชฺชํ วิปุลํ คณนาโต อสงฺขยํ

สพฺพตฺถ สุขิโต หุตฺวา สํสาเร สํสริสฺสติ ฯ

อิทํ วตฺวาน สมฺพุทฺโธ ชลชุตฺตมนามโก

นภํ อพฺภุคฺคมิ ธีโร หํสราชาว อมฺพเร ฯห

หตฺถิยานํ อสฺสยานํ สรถํ สนฺทมานิกํ

ลภามิ สพฺพเมเวตํ เอกาสนสฺสิทํ ผลํ ฯ

กานนํ ปวิสิตฺวาน ยทา อิจฺฉามิ อาสนํ

มม สงฺกปฺปมญฺญาย ปลฺลงฺโก อุปติฏฺฐติ ฯ

วาริมชฺฌคโต สนฺโต ยทา อิจฺฉามิ อาสนํ

มม สงฺกปฺปมญฺญาย ปลฺลงฺโก อุปติฏฺฐติ ฯ

ยํ ยํ โยนูปปชฺชามิ เทวตฺตํ อถ มานุสํ

ปลฺลงฺกสตสหสฺสานิ ปริวาเรนฺติ มํ สทา ฯ #๑ ม. ยุ. ปริปูริสฺสตินาคเต ฯ ๒ ม. น โมฆํ ตํ กตํ ตุยฺหํ ฯ ยุ. น โถกํ ตํ #กตํ ตุยฺหํ ฯ ๓ ม. ยุ. ปณีหิตํ ฯ