มหากสฺสปเถโรปิ อุคฺคตกนกสนฺนิโภ

ธูตคุเณ อคฺคนิกฺขิตฺโต โถมิโต สตฺถุวณฺณิโต ฯ

ทิพฺพจกฺขูน โย อคฺโค อนุรุทฺโธ มหาคณี

ญาติเสฏฺโฐ ภควโต อวิทูเรว ติฏฺฐติ ฯ

อาปตฺติอนาปตฺติยา สเตกิจฺฉาย โกวิโท

วินเย อคฺคนิกฺขิตฺโต อุปาลิ สตฺถุวณฺณิโต ฯ

สุขุมนิปุณตฺถปฏิวิทฺโธ กถิกานํ ปวโร คณี

อิสิ มนฺตานิยา ปุตฺโต ปุณฺโณ นามาติ วิสฺสุโต ฯ

เอเตสํ จิตฺตมญฺญาย โอปมฺมกุสโล มุนิ

กงฺขจฺเฉโท มหาวีโร กเถสิ อตฺตโน คุณํ ฯ

จตฺตาโร เต อสงฺเขยฺยา โกฏิ เยสํ น นายติ

สตฺตกาโย จ อากาโส จกฺกวาฬา อนนฺตกา

พุทฺธญาณํ อปฺปเมยฺยํ น สกฺกา เอเต วิชานิตุํ ฯ

กิเมตํ อจฺฉริยํ โลเก ยํ เม อิทฺธิวิกุพฺพนํ

อญฺเญ พหู อจฺฉริยา อพฺภูตา โลมหํสนา ฯ

ยทาหํ ตุสิเต กาเย สนฺตุสิโต นามหํ ตทา

ทสสหสฺสี สมาคมฺม ยาจนฺติ อญฺชลี มมํ ฯ

กาโลยํ เต มหาวีร อุปฺปชฺช มาตุกุจฺฉิยํ

สเทวกํ ตารยนฺโต พุชฺฌสฺสุ อมตํปทํ ฯ