ธมฺมเมฆํ วสฺสิตฺวาน ๑ เตมยิตฺวา สเทวเก

เขมตํ ปาปยิตฺวาน นิพฺพุโต โส สสาวโก ฯ

อนุพฺยญฺชนสมฺปนฺนํ ทฺวตฺตึสวรลกฺขณํ

สพฺพํ สมนฺตรหิตํ นนุ ริตฺตา สพฺพสงฺขาราติ ฯ

สิขี มุนิวโร พุทฺโธ อสฺสารามมฺหิ ๒ นิพฺพุโต

ตตฺเถว ตสฺส ถูปวโร ตีณิ โยชนมุคฺคโตติ ฯ

สิขิพุทฺธวํโส วีสติโม ฯ

เอกวีสติโม เวสฺสภูพุทฺธวํโส

[๒๒] ตตฺเถว มณฺฑกปฺปมฺหิ อสโม อปฺปฏิปุคฺคโล

เวสฺสภู นาม นาเมน โลเก อุปฺปชฺชิ โส ๓ ชิโน ฯ

อาทิตฺตํ อิท ๔ ราคคฺคิ ตณฺหานํ วิชิตํ ชานํ ๕

นาโคว พนฺธนํ เฉตฺวา ปตฺโต สมฺโพธิมุตฺตมํ ฯ

ธมฺมจกฺกํ ปวตฺเตสิ เวสฺสภู โลกนายโก

อสีติโกฏิสหสฺสานํ ปฐมาภิสมโย อหุ ฯ

ปกฺกนฺเต จาริกํ รฏฺเฐ โลกเชฏฺเฐ นราสเภ

สตฺตติโกฏิสหสฺสานํ ทุติยาภิสมโย อหุ ฯ

มหาทิฏฺฐึ วิโนเทนฺโต ปาฏิเหรํ ๖ กโรติ โส

สมาคตา นรมรู ทสสหสฺสีสเทวเก ฯ #๑ ม. ปวสฺเสตฺวา ฯ ยุ. ธมฺมเมโฆ ปวสฺเสตฺวา ฯ ๒ ยุ. ทุสฺสารานมฺหิ ฯ ๓ ม. #นายโก ฯ ๔ ม. วต ฯ ยุ. อาทิตฺตํ ติ จ ฯ ๕ ม. ตทา ฯ ยุ. สทา ฯ ๖ ยุ. ปาฏิหีรํ ฯ