มหาอจฺฉริยํ ทิสฺวา อพฺภูตํ โลมหํสนํ

เทวา เจว มนุสฺสา จ พุชฺฌเร สฏฺฐิโกฏิโย ฯ

สนฺนิปาตา ตโย อาสุํ เวสฺสภุสฺส มเหสิโน

ขีณาสวานํ วิมลานํ สนฺตจิตฺตาน ตาทินํ ฯ

อสีติโกฏิสหสฺสานํ ปฐโม อาสิ สมาคโม

สตฺตติภิกฺขุสหสฺสานํ ทุติโย อาสิ สมาคโม ฯ

สฏฺฐิภิกฺขุสหสฺสานํ ตติโย อาสิ สมาคโม

ชราทิภยภีตานํ โอรสานํ มเหสิโน ๑ ฯ

ตสฺส พุทฺธสฺส อสมสฺส จกฺกํ วตฺติตมุตฺตมํ

สุตฺวาน ปณีตํ ธมฺมํ ปพฺพชฺชมภิโรจยิ ฯ

อหนฺเตน สมเยน สุทสฺสโน นาม ขตฺติโย

อนฺนปาเนน วตฺเถน สสงฺฆํ ชินมปูชยึ ฯ

มหาทานํ ปวตฺเตตฺวา รตฺตินฺทิวมตนฺทิโต

ปพฺพชฺชํ คุณสมฺปนฺนํ ปพฺพชึ ชินสนฺติเก ฯ

อาจารคุณสมฺปนฺโน วตฺตสีลสมาหิโต

สพฺพญฺญุตํ คเวสนฺโต รมามิ ชินสาสเน ฯ

สทฺธาปีตึ อุปฺปาเทตฺวา พุทฺธํ วนฺทามิ สตฺถรํ

ปีติ อุปฺปชฺชติ มยฺหํ โพธิยาเยว การณา ฯ

อนิวตฺตมานสํ ญตฺวา สมฺพุทฺโธ เอตทพฺรวิ

เอกตฺตึเส อิโต กปฺเป อยํ พุทฺโธ ภวิสฺสติ ฯ #๑ ยุ. มเหสินํ ฯ