เอโส หิ สมฺมาสมฺพุทฺโธ อปฺปเมยฺโย ทุราสโท

เอโส หิ ธมฺมรตโน สฺวากฺขาโต เอหิปสฺสิโก ฯ

เอโส หิ สงฺฆรตโน สุปฏิปนฺโน อนุตฺตโร

สพฺพํ สมนฺตรหิตํ นนุ ริตฺตา สพฺพสงฺขาราติ ฯ

มหากสฺสโป ชิโน สตฺถา เสตพฺยารามมฺหิ นิพฺพุโต

ตตฺเถว ตสฺส ชินถูโป โยชนุพฺเพธมุคฺคโตติ ฯ

กสฺสปพุทฺธวํโส จตุวีสติโม ฯ

ปญฺจวีสติโม โคตมพุทฺธวํโส

[๒๖] อหเมตรหิ สมฺพุทฺโธ โคตโม สกฺยวฑฺฒโน

ปธานํ ปทหิตฺวาน ปตฺโต สมฺโพธิมุตฺตมํ ฯ

พฺรหฺมุนา ยาจิโต สนฺโต ธมฺมจกฺกํ ปวตฺตยึ

อฏฺฐารสนฺนํ โกฏีนํ ปฐมาภิสมโย อหุ ฯ

ตโต ปรญฺจ เทเสนฺโต นรเทวสมาคเม ๑

คณนาย น วตฺตพฺโพ ทุติยาภิสมโย อหุ ฯ

อิเธวาหํ เอตรหิ โอวทึ มม อตฺรชํ

คณนาย น วตฺตพฺโพ ตติยาภิสมโย อหุ ฯ

เอโกสิ ๒ สนฺนิปาโต เม สาวกานํ มเหสินํ

อฑฺฒเตฬสสตานํ ภิกฺขูนาสิ สมาคโม ฯ

วิโรจมาโน วิมโล ภิกฺขุสงฺฆสฺส มชฺฌโต ๓

ททามิ ปตฺถิตํ สพฺพํ มณีว สพฺพกามโท ฯ #๑ ยุ. ... สมาคโม ฯ ๒ ยุ. เอโกว ฯ ๓ ม. มชฺฌโค ฯ