ผลมากงฺขมานานํ ภวจฺฉนฺทํ ชเหสินํ

จตุสจฺจํ ปกาเสสิ ๑ อนุกมฺปาย ปาณินํ ฯ

ทสวีสสหสฺสานํ ธมฺมาภิสมโย อหุ

เอกทฺวินฺนํ อภิสมโย คณนาโต อสงฺขิโย ฯ

วิตฺถาริกํ พหุชญฺญํ อิทฺธํ ผีตํ สุผุลฺลิตํ

อิธ มยฺหํ สกฺยมุนิโน สาสนํ สุวิโสธิตํ ฯ

อนาสวา วีตราคา สนฺตจิตฺตา สมาหิตา

ภิกฺขู เนกสตา สพฺเพ ปริวาเรนฺติ มํ สทา ฯ

อิทานิ เย เอตรหิ ชหนฺติ มานุสํ ภวํ

อปฺปตฺตมานสา เสกฺขา เต ภิกฺขู วิญฺญูครหิตา ฯ

อริยญฺชสํ โถมยนฺตา สทา ธมฺมรตา ชนา

พุชฺฌิสฺสนฺติ ชุติมนฺโต ๒ สํสารสริตา ๓ นรา ฯ

นครํ กปิลวตฺถุ เม ราชา สุทฺโธทโน ปิตา

มยฺหํ ชเนตฺติกา มาตา มายาเทวีติ วุจฺจติ ฯ

เอกูนตึสวสฺสานิ อคารํ อชฺฌาวสิหํ ๔

สุจนฺโท ๕ โกกนุโท โกญฺโจ ตโย ปาสาทมุตฺตมา ฯ

จตฺตาฬีสสหสฺสานิ นาริโย สมลงฺกตา

ยโสธรา ๖ นาม นารี ราหุโล นาม อตฺรโช ฯ

นิมิตฺเต จตุโร ทิสฺวา อสฺสยาเนน นิกฺขมึ #๑ ม. ปกาเสมิ ฯ ๒ ม. ยุ. สติมนฺโต ฯ ๓ ม. สํสารสริตํ คตา ฯ #๔ ม. ยุ. อชฺฌหํ วสึ ฯ ๕ ม. รมฺโม สุรมฺโม สุภโก ฯ ยุ. ราโม สุราโม สุภโต ฯ #๖ ม. ภทฺทกญฺจนา ฯ ยุ. ภทฺทกจฺจา ฯ