ฉวสฺสํ ปธานจารํ อจรึ ทุกฺกรํ อหํ ฯ

พาราณสีอิสิปตเน ชิโน ๑ จกฺกํ ปวตฺตยึ

อหํ โคตมสมฺพุทฺโธ สรณํ สพฺพปาณินํ ฯ

โกลิโต อุปติสฺโส จ เทฺว ภิกฺขู อคฺคสาวกา

อานนฺโท นามุปฏฺฐาโก สนฺติกาวจโร มม ฯ

เขมา อุปฺปลวณฺณา จ ภิกฺขุนี อคฺคสาวิกา

จิตฺโต จ หตฺถาฬวโก อคฺคุปฏฺฐากุปาสกา ฯ

นนฺทมาตา จ อุตฺตรา อคฺคุปฏฺฐากุปาสิกา

อหํ อสฺสตฺถมูลมฺหิ ปตฺโต สมฺโพธิมุตฺตมํ ฯ

พฺยามปฺปภา สทา มยฺหํ โสฬสหตฺถมุคฺคโต ๒

อปฺปํ วสฺสสตํ อายุ มเมตรหิ ๓ วิชฺชติ ฯ

ตาวตา ติฏฺฐมาโนหํ ตาเรสึ ๔ ชนตํ พหุํ

ฐปยิตฺวาน ธมฺโมกฺกํ ๕ ปจฺฉิมชนโพธนํ ฯ

อหํปิ น จิรสฺเสว สทฺธึ สาวกสงฺฆโต

อิเธว ปรินิพฺพิสฺสํ อคฺคิวาหารสงฺขยา ฯ

ตานิ [๖] อตุลเตชานิ อิมานิ จ ยสพลานิ ๗ อิทฺธิโย

อหํ ๘ คุณธารโณ เทโห ทฺวตฺตึสวรลกฺขณวิจิตฺโต ฯ

ทสทิสา ๙ ปภาเสตฺวา สตรํสีว ฉปฺปภา

สพฺพา สมนฺตรเหสฺสนฺติ นนุ ริตฺตา สพฺพสงฺขาราติ ฯ

โคตมพุทฺธวํโส ปญฺจวีสติโม ฯ

#๑ ม. ยุ. จกฺกํ ปวตฺติตํ มยา ฯ ๒ ม. ...มุคฺคตา ฯ ๓ ม. ยุ. อิทาเนตรหิ ฯ #๔ ม. ยุ. ตาเรมิ ฯ ๕ ม. ธมฺมกฺกํ ฯ ๖ ม. ยุ. จ ฯ ๗ ม. ยุ. ทสพลานิ ฯ #๘ ม. ยุ. อยญฺจ คุณวรเทโห ทฺวตฺตึสลกฺขณาจิโต ฯ ๙ ยุ. อสทิสา ฯ