อิติ สายญฺจ ปาโต จ โฆสาเปมิ ตหึ ตหึ
น ตํ ทสสุ ฐาเนสุ น หิ ๑ ฐานสเตสุ วา ฯ
อเนกสตฐาเนสุ ปฏิยตฺตํ ยาจเก ธนํ
ทิวา วา ยทิวา รตฺตึ ยทิ เอติ วณิพฺพโก ฯ
ลทฺธา ยทิจฺฉกํ โภคํ ปูรหตฺโถว คจฺฉติ
เอวรูปํ มหาทานํ อทาสึ ยาวชีวิกํ ฯ
นปาหํ เทสฺสํ ธนํ ทมฺมิ นปิ นตฺถิ นิจโย มยิ
ยถาปิ อาตุโร นาม โรคโต ปริมุตฺติยา ฯ
ธเนน เวชฺชํ ตปฺเปตฺวา โรคโต ปริมุจฺจติ
ตเถวาหํ ชานมาโน ปริปูเรตุํ อเสสโต ฯ
อูนมนํ ปูรยิตุํ เทมิ ทานํ วณิพฺพเก
นิราลโย อปจฺจาโส สมฺโพธิมนุปตฺติยาติ ฯ
มหาสุทสฺสนจริยํ จตุตฺถํ ฯ
ปญฺจมํ มหาโควินฺทจริยํ
[๕] ปุนาปรํ ยทา โหมิ สตฺตราชปุโรหิโต
ปูชิโต นรเทเวหิ มหาโควินฺทพฺราหฺมโณ ฯ
ตทาหํ สตฺตรชฺเชสุ ยํ เม อาสิ อุปายนํ
เตน เทมิ มหาทานํ อกฺโขภํ ๒ สาครูปมํ ฯ #๑ ม. ยุ. นปิ ฯ ๒ ม. อกฺโขพฺภํ ฯ