น เม เทสฺสํ ธนธญฺญํ นปิ นตฺถิ นิจโย มยิ
สพฺพญฺญุตํ ปิยํ มยฺหํ ตสฺมา เทมิ วรํ ธนนฺติ ฯ
มหาโควินฺทจริยํ ปญฺจมํ ฯ
ฉฏฺฐํ เนมิราชจริยํ
[๖] ปุนาปรํ ยทา โหมิ มิถิลายํ ปุรุตฺตเม
เนมิ นาม มหาราชา ปณฺฑิโต กุสลตฺถิโก ฯ
ตทาหํ มาปยิตฺวาน จตุสาลํ จตุมฺมุขํ
ตตฺถ ทานํ ปวตฺเตสึ มิคปกฺขินราทินํ ๑ ฯ
อจฺฉาทนํ สยนญฺจ อนฺนํ ปานญฺจ โภชนํ
อพฺโพจฺฉินฺนํ กริตฺวาน มหาทานํ ปวตฺตยึ ฯ
ยถาปิ เสวโก สามึ ธนเหตุมุปาคโต
กาเยน วาจามนสา อาราธนียเมสติ ฯ
ตเถวาหํ สพฺพภเว ปริเยสิสฺสามิ โพธิชํ
ทาเนน สตฺเต ตปฺเปตฺวา อิจฺฉามิ โพธิมุตฺตมนฺติ ฯ
เนมิราชจริยํ ฉฏฺฐํ ฯ
สตฺตมํ จนฺทกุมารจริยํ
[๗] ปุนาปรํ ยทา โหมิ เอกราชสฺส อตฺรโช
นคเร ปุปฺผวติยา กุมาโร จนฺทสวฺหโย ฯ #๑ ยุ. ... นรนารินํ ฯ