มาตา ปิตา น เม เทสฺสา นปิ เม เทสฺสา ๑ มหายสา
สพฺพญฺญุตํ ปิยํ มยฺหํ ตสฺมา รชฺชํ ปริจฺจชินฺติ ฯ
อโยฆรจริยํ ตติยํ ฯ
จตุตฺถํ ภึสจริยํ
[๒๔] ปุนาปรํ ยทา โหมิ กาสีนํ ปุรวรุตฺตเม
ภคินี จ ภาตโร สตฺต นิพฺพตฺตา โสตฺถิเย กุเล ฯ
เอเตสํ ปุพฺพโช อาสึ หิริสุกฺกมุปาคโต
ภวํ ทิสฺวาน ภยโต เนกฺขมฺมาภิรโต อหํ ฯ
มาตาปิตูหิ ปหิตา สหายา เอกมานสา
กาเมหิ มํ นิมนฺเตนฺติ กุลวํสํ ธาเรหีติ ฯ
ยนฺเตสํ วจนํ วุตฺตํ คิหิธมฺเม สุขาวหํ
ตมฺเม อโหสิ กฐินํ ตตฺตผาลสมํ วิย ฯ
เต มํ ตทา อุกฺขิปนฺตํ ปุจฺฉึสุ ปตฺถิตํ มม
กึ ตฺวํ ปตฺถยสิ ๒ สมฺม ยทิ กาเม น ภุญฺชสิ ฯ
เตสาหํ เอวมวจํ อตฺตกาโม หิเตสินํ
นาหํ ปตฺเถมิ คิหิภาวํ เนกฺขมฺมาภิรโต อหํ ฯ
เต มยฺหํ วจนํ สุตฺวา ปิตุํ มาตุญฺจ สาวยุํ
มาตา ปิตา เอวมาหุ สพฺเพปิ ปพฺพชาม โภ ฯ #๑ ม. ยุ. เทสฺสํ มหายสํ ฯ ๒ ม. ปตฺถยเส ฯ