ฉฏฺฐํ มูคผกฺขจริยํ

[๒๖] ปุนาปรํ ยทา โหมิ กาสิราชสฺส อตฺรโช

มูคผกฺโขติ ๑ นาเมน เตมิโยติ วทนฺติ มํ ฯ

โสฬสิตฺถีสหสฺสานํ น วิชฺชติ ปุโม ตทา

อโหรตฺตานมจฺจเยน นิพฺพตฺโต อหเมกโก ฯ

กิจฺฉา ลทฺธํ ปิยํ ปุตฺตํ อภิชาตํ ชุตินฺธรํ

เสตจฺฉตฺตํ ธารยิตฺวาน สยเน โปเสสิ มํ ปิตา ฯ

นิทฺทายมาโน สยนวเร ปพุชฺฌิตฺวานหํ ตทา

อทฺทสํ ปณฺฑรํ ฉตฺตํ เยนาหํ นิรยํ คโต ฯ

สห ทิฏฺฐิสฺส ๒ เม ฉตฺตํ ตาโส อุปฺปชฺชิ เภรโว

วินิจฺฉยํ สมาปนฺโน กทาหํ อิมํ มุญฺจิสฺสํ ฯ

ปุพฺพสาโลหิตา มยฺหํ เทวตา อตฺถกามินี

สา มํ ทิสฺวาน ทุกฺขิตํ ตึสุ ฐาเนสุ โยชยิ ฯ

มา ปณฺฑิจฺจยํ วิภาวย พาลมโต ภว สพฺพปาณินํ

สพฺโพ ตญฺชโน โอจินายตุ เอวํ ตว อตฺโถ ภวิสฺสติ ฯ

เอวํ วุตฺตายหํ ตสฺสา อิทํ วจนมพฺรวึ

กโรมิ เต ตํ วจนํ ยํ มํ ภณสิ เทวเต ฯ

อตฺถกามาสิ เม อมฺม หิตกามาสิ เทวเต

ตสฺสาหํ วจนํ สุตฺวา สาคเรว ถลํ ลภึ ฯ #๑ ม. ยุ. มูคปกฺโขติ ฯ ๒ ม. ทิฏฺฐสฺส ฯ