ปณฺณรสมํ มหาโลมหํสจริยํ

[๓๕] สุสาเน เสยฺยํ กปฺเปมิ ฉวฏฺฐิกํ อุปนิธาย ๑

คามมณฺฑลา อุปาคนฺตฺวา รูปํ ทสฺเสนฺติ นปฺปกํ ฯ

อปเร คนฺธญฺจ มาลญฺจ โภชนํ วิวิธํ พหุํ

อุปายนานิ อุปเนนฺติ หฏฺฐา สํวิคฺคมานสา ฯ

เย เม ทุกฺขํ อุปหรนฺติ เย จ เทนฺติ สุขํ มม

สพฺเพสํ สมโก โหมิ ทยา โกโป น วิชฺชติ ฯ

สุขทุกฺเข ตุลาภูโต ยเสสุ อยเสสุ จ

สพฺพตฺถ สมโก โหมิ เอสา เม อุเปกฺขาปารมีติ ฯ

มหาโลมหํสจริยํ ปณฺณรสมํ ฯ

ตสฺสุทฺทานํ

ยุธญฺชโย โสมนสฺโส อโยฆรภิเสน จ

โสณนนฺโท มูคผกฺโข กปิราชา สจฺจสวฺหโย ฯ

วฏฺฏโก มจฺฉราชา จ กณฺหทีปายโน อิสิ

สุตโสโม ปุเร ๒ อาสิ สาโม จ เอกราชา ๓ จ

อุเปกฺขาปารมี อาสิ อิติ วุตฺตํ มเหสินา ฯ

เอวํ พหุวิธํ ทุกฺขํ สมฺปตฺติญฺจ พหูวิธํ

ภวาภเว อนุภวิตฺวา ปตฺโต สมฺโพธิมุตฺตมํ ฯ

ทตฺวา ทาตพฺพกํ ทานํ สีลํ ปูเรตฺวา อเสสโต

นิกฺขมฺมปารมึ คนฺตฺวา ปตฺโต สมฺโพธิมุตฺตมํ ฯ #๑ ม. อุปนิธายหํ ฯ ยุ. นิธายหํ ฯ ๒ ม. ยุ. ปุน อาสึ ฯ ๓ ม. ยุ. เอกราชหุ ฯ