“Susāne seyyaṁ kappemi, Chavaṭṭhikaṁ upanidhāyahaṁ; Gāmaṇḍalā upāgantvā, Rūpaṁ dassentinappakaṁ. Apare gandhamālañca, bhojanaṁ vividhaṁ bahuṁ; Upāyanānūpanenti, haṭṭhā saṁviggamānasā. Ye me dukkhaṁ upaharanti, ye ca denti sukhaṁ mama; Sabbesaṁ samako homi, dayā kopo na vijjati. Sukhadukkhe tulābhūto, Yasesu ayasesu ca; Sabbattha samako homi, Esā me upekkhāpāramī”ti. Mahālomahaṁsacariyaṁ pannarasamaṁ. Yudhañjayavaggo tatiyo. Tassuddānaṁ Yudhañjayo somanasso, ayogharabhisena ca; Soṇanando mūgapakkho, kapirājā saccasavhayo. Vaṭṭako maccharājā ca, kaṇhadīpāyano isi; Sutasomo puna āsiṁ, sāmo ca ekarājahu; Upekkhāpāramī āsi, iti vutthaṁ mahesinā. Evaṁ bahubbidhaṁ dukkhaṁ, sampattī ca bahubbidhā; Bhavābhave anubhavitvā, patto sambodhimuttamaṁ. Datvā dātabbakaṁ dānaṁ, sīlaṁ pūretvā asesato; Nekkhamme pāramiṁ gantvā, patto sambodhimuttamaṁ.