กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา มณิปูชโก เถโร อิมา คาถาโย อภาสิตฺถาติ ฯ
มณิปูชกตฺเถรสฺส อปทานํ สมตฺตํ ฯ
ตติยํ อุกฺกาสติกตฺเถราปทานํ (๔๗๓)
[๖๓] โกสิโก นาม ภควา จิตฺตกูเฏ วสี ตทา
ฌายี ฌานรโต พุทฺโธ วิเวกาภิรโต มุนิ ฯ
อชฺโฌคเหตฺวา ๑ หิมวนฺตํ นารีคณปุรกฺขโต
อทฺทสํ โกสิกํ พุทฺธํ ปุณฺณมาเยว จนฺทิมํ ฯ
อุกฺกาสเต คเหตฺวาน ปริวาเรสหนฺตทา
สตฺตรตฺตินฺทิวํ พุทฺธํ ๒ อฏฺฐเมน อคจฺฉหํ ฯ
วุฏฺฐิตํ โกสิกํ พุทฺธํ สยมฺภุํ อปราชิตํ
ปสนฺนจิตฺโต วนฺทิตฺวา เอกํ ภิกฺขํ อทาสหํ ฯ
เตน กมฺเมน ทิปทินฺท โลกเชฏฺฐ นราสภ
อุปฺปชฺชึ ตุสิเต กาเย เอกภิกฺขายิทํ ผลํ ฯ #๑ ม. อชฺโฌคาเหตฺวา ฯ ๒ ม. ยุ. ฐตฺวา ฯ