Kilesā jhāpitā mayhaṁ, …pe… viharāmi anāsavo. Svāgataṁ vata me āsi, …pe… kataṁ buddhassa sāsanaṁ. Paṭisambhidā catasso, …pe… kataṁ buddhassa sāsanaṁ”. Itthaṁ sudaṁ āyasmā maṇipūjako thero imā gāthāyo abhāsitthāti. Maṇipūjakattherassāpadānaṁ dutiyaṁ. Naḷamālivagga Ukkāsatikattheraapadāna “Kosiyo nāma bhagavā, cittakūṭe vasī tadā; Jhāyī jhānarato buddho, vivekābhirato muni. Ajjhogāhetvā himavantaṁ, Nārīgaṇapurakkhato; Addasaṁ kosiyaṁ buddhaṁ, Puṇṇamāyeva candimaṁ. Ukkāsate gahetvāna, parivāresahaṁ tadā; Sattarattindivaṁ ṭhatvā, aṭṭhamena agacchahaṁ. Vuṭṭhitaṁ kosiyaṁ buddhaṁ, sayambhuṁ aparājitaṁ; Pasannacitto vanditvā, ekaṁ bhikkhaṁ adāsahaṁ. Tena kammena dvipadinda, lokajeṭṭha narāsabha; Uppajjiṁ tusite kāye, ekabhikkhāyidaṁ phalaṁ.