Tattha katamaṁ vīriyindriyaṁ? Yo cetasiko vīriyārambho nikkamo parakkamo uyyāmo vāyāmo ussāho ussoḷhī thāmo ṭhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ— idaṁ vuccati “vīriyindriyaṁ”. Tattha katamaṁ satindriyaṁ? Yā sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati— idaṁ vuccati “satindriyaṁ”. Tattha katamaṁ samādhindriyaṁ? Yā cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi— idaṁ vuccati “samādhindriyaṁ”. Tattha katamaṁ paññindriyaṁ? Yā paññā pajānanā …pe… amoho dhammavicayo sammādiṭṭhi— idaṁ vuccati “paññindriyaṁ”. Tattha katamaṁ anaññātaññassāmītindriyaṁ? Yā tesaṁ dhammānaṁ anaññātānaṁ adiṭṭhānaṁ appattānaṁ aviditānaṁ asacchikatānaṁ sacchikiriyāya paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ— idaṁ vuccati “anaññātaññassāmītindriyaṁ”. Tattha katamaṁ aññindriyaṁ? Yā tesaṁ dhammānaṁ ñātānaṁ diṭṭhānaṁ pattānaṁ viditānaṁ sacchikatānaṁ sacchikiriyāya paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ— idaṁ vuccati “aññindriyaṁ”.
