Tasmiṁ samaye avijjāpaccayā saṅkhāro avijjāhetuko, saṅkhārapaccayā viññāṇaṁ saṅkhārahetukaṁ, viññāṇapaccayā nāmaṁ viññāṇahetukaṁ, nāmapaccayā chaṭṭhāyatanaṁ nāmahetukaṁ, chaṭṭhāyatanapaccayā phasso chaṭṭhāyatanahetuko, phassapaccayā vedanā phassahetukā, vedanāpaccayā taṇhā vedanāhetukā, taṇhāpaccayā upādānaṁ taṇhāhetukaṁ; upādānapaccayā bhavo, bhavapaccayā jāti, jātipaccayā jarāmaraṇaṁ. Evametassa kevalassa dukkhakkhandhassa samudayo hoti. Tattha katamā avijjā? Yaṁ aññāṇaṁ adassanaṁ …pe… avijjālaṅgī moho akusalamūlaṁ— ayaṁ vuccati “avijjā”. Tattha katamo avijjāpaccayā saṅkhāro avijjāhetuko? Yā cetanā sañcetanā sañcetayitattaṁ— ayaṁ vuccati “avijjāpaccayā saṅkhāro avijjāhetuko”. Tattha katamaṁ saṅkhārapaccayā viññāṇaṁ saṅkhārahetukaṁ? Yaṁ cittaṁ mano mānasaṁ …pe… tajjāmanoviññāṇadhātu— idaṁ vuccati “saṅkhārapaccayā viññāṇaṁ saṅkhārahetukaṁ”. Tattha katamaṁ viññāṇapaccayā nāmaṁ viññāṇahetukaṁ? Vedanākkhandho, saññākkhandho, saṅkhārakkhandho— idaṁ vuccati “viññāṇapaccayā nāmaṁ viññāṇahetukaṁ”. Tattha katamaṁ nāmapaccayā chaṭṭhāyatanaṁ nāmahetukaṁ? Yaṁ cittaṁ mano mānasaṁ …pe… tajjāmanoviññāṇadhātu— idaṁ vuccati “nāmapaccayā chaṭṭhāyatanaṁ nāmahetukaṁ”. Tattha katamo chaṭṭhāyatanapaccayā phasso chaṭṭhāyatanahetuko? Yo phasso phusanā samphusanā samphusitattaṁ— ayaṁ vuccati “chaṭṭhāyatanapaccayā phasso chaṭṭhāyatanahetuko”. Tattha katamā phassapaccayā vedanā phassahetukā? Yaṁ cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā— ayaṁ vuccati “phassapaccayā vedanā phassahetukā”. Tattha katamā vedanāpaccayā taṇhā vedanāhetukā? Yo rāgo sārāgo …pe… cittassa sārāgo— ayaṁ vuccati “vedanāpaccayā taṇhā vedanāhetukā”.