“Sabbadhi sabbattatāya sabbāvantaṁ lokan”ti sabbena sabbaṁ sabbathā sabbaṁ asesaṁ nissesaṁ. Pariyādāyavacanametaṁ— “sabbadhi sabbattatāya sabbāvantaṁ lokan”ti. “Upekkhāsahagatena cetasā”ti, tattha katamā upekkhā? Yā sattesu upekkhā upekkhāyanā upekkhāyitattaṁ upekkhācetovimutti— ayaṁ vuccati “upekkhā”. Tattha katamaṁ cittaṁ? Yaṁ cittaṁ mano mānasaṁ …pe… tajjāmanoviññāṇadhātu— idaṁ vuccati “cittaṁ”. Idaṁ cittaṁ imāya upekkhāya sahagataṁ hoti sahajātaṁ saṁsaṭṭhaṁ sampayuttaṁ. Tena vuccati “upekkhāsahagatena cetasā”ti. “Vipulenā”ti yaṁ vipulaṁ taṁ mahaggataṁ, yaṁ mahaggataṁ taṁ appamāṇaṁ, yaṁ appamāṇaṁ so avero, yo avero so abyāpajjo. “Pharitvā”ti pharitvā adhimuccitvā. “Viharatī”ti …pe… tena vuccati “viharatī”ti. Suttantabhājanīyaṁ.

2. Abhidhammabhājanīya

2.1. Kusala Catasso appamaññāyo— mettā, karuṇā, muditā, upekkhā. Tattha katamā mettā? Idha bhikkhu yasmiṁ samaye rūpūpapattiyā maggaṁ bhāveti vivicceva kāmehi …pe… paṭhamaṁ jhānaṁ upasampajja viharati mettāsahagataṁ, yā tasmiṁ samaye metti mettāyanā mettāyitattaṁ mettācetovimutti— ayaṁ vuccati “mettā”. Avasesā dhammā mettāya sampayuttā.