Bahuvidhena viññāṇakkhandho— cakkhusamphassapaccayā viññāṇakkhandho atthi kusalo, atthi akusalo, atthi abyākato, atthi kāmāvacaro, atthi rūpāvacaro, atthi arūpāvacaro, atthi apariyāpanno, cakkhuviññāṇaṁ …pe… manoviññāṇaṁ; sotasamphassapaccayā …pe… ghānasamphassapaccayā …pe… jivhāsamphassapaccayā …pe… kāyasamphassapaccayā …pe… manosamphassapaccayā viññāṇakkhandho atthi kusalo, atthi akusalo, atthi abyākato, atthi kāmāvacaro, atthi rūpāvacaro, atthi arūpāvacaro, atthi apariyāpanno, cakkhuviññāṇaṁ …pe… manoviññāṇaṁ. Evaṁ bahuvidhena viññāṇakkhandho. Aparopi bahuvidhena viññāṇakkhandho— cakkhusamphassapaccayā viññāṇakkhandho atthi sukhāya vedanāya sampayutto …pe… atthi ajjhattārammaṇo, atthi bahiddhārammaṇo, atthi ajjhattabahiddhārammaṇo, atthi kāmāvacaro, atthi rūpāvacaro, atthi arūpāvacaro, atthi apariyāpanno; sotasamphassapaccayā …pe… ghānasamphassapaccayā …pe… jivhāsamphassapaccayā …pe… kāyasamphassapaccayā …pe… manosamphassapaccayā viññāṇakkhandho atthi sukhāya vedanāya sampayutto …pe… atthi ajjhattārammaṇo, atthi bahiddhārammaṇo, atthi ajjhattabahiddhārammaṇo, atthi kāmāvacaro, atthi rūpāvacaro, atthi arūpāvacaro, atthi apariyāpanno; cakkhuviññāṇaṁ, sotaviññāṇaṁ, ghānaviññāṇaṁ, jivhāviññāṇaṁ, kāyaviññāṇaṁ, manoviññāṇaṁ. Evaṁ bahuvidhena viññāṇakkhandho. Ayaṁ vuccati viññāṇakkhandho. Abhidhammabhājanīyaṁ.

3. Pañhāpucchaka

Pañcakkhandhā— rūpakkhandho, vedanākkhandho, saññākkhandho, saṅkhārakkhandho, viññāṇakkhandho.