Tattha katamo dhammavicayasambojjhaṅgo? Yā paññā pajānanā …pe… amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ— ayaṁ vuccati “dhammavicayasambojjhaṅgo”. Tattha katamo vīriyasambojjhaṅgo? Yo cetasiko vīriyārambho …pe… sammāvāyāmo vīriyasambojjhaṅgo maggaṅgaṁ maggapariyāpannaṁ— ayaṁ vuccati “vīriyasambojjhaṅgo”. Tattha katamo pītisambojjhaṅgo? Yā pīti pāmojjaṁ āmodanā pamodanā hāso pahāso vitti odagyaṁ attamanatā cittassa pītisambojjhaṅgo— ayaṁ vuccati “pītisambojjhaṅgo”. Tattha katamo passaddhisambojjhaṅgo? Yā vedanākkhandhassa saññākkhandhassa saṅkhārakkhandhassa viññāṇakkhandhassa passaddhi paṭippassaddhi passambhanā paṭippassambhanā paṭippassambhitattaṁ passaddhisambojjhaṅgo— ayaṁ vuccati “passaddhisambojjhaṅgo”. Tattha katamo samādhisambojjhaṅgo? Yā cittassa ṭhiti …pe… sammāsamādhi samādhisambojjhaṅgo maggaṅgaṁ maggapariyāpannaṁ— ayaṁ vuccati “samādhisambojjhaṅgo”.