Rūpakkhandho anārammaṇo. Cattāro khandhā sārammaṇā. Viññāṇakkhandho cittaṁ. Cattāro khandhā no cittā. Tayo khandhā cetasikā. Dve khandhā acetasikā. Tayo khandhā cittasampayuttā. Rūpakkhandho cittavippayutto. Viññāṇakkhandho na vattabbo— “cittena sampayutto”tipi, “cittena vippayutto”tipi. Tayo khandhā cittasaṁsaṭṭhā. Rūpakkhandho cittavisaṁsaṭṭho. Viññāṇakkhandho na vattabbo— “cittena saṁsaṭṭho”tipi, “cittena visaṁsaṭṭho”tipi. Tayo khandhā cittasamuṭṭhānā. Viññāṇakkhandho no cittasamuṭṭhāno. Rūpakkhandho siyā cittasamuṭṭhāno, siyā no cittasamuṭṭhāno. Tayo khandhā cittasahabhuno. Viññāṇakkhandho no cittasahabhū. Rūpakkhandho siyā cittasahabhū, siyā no cittasahabhū. Tayo khandhā cittānuparivattino. Viññāṇakkhandho no cittānuparivatti. Rūpakkhandho siyā cittānuparivatti, siyā no cittānuparivatti. Tayo khandhā cittasaṁsaṭṭhasamuṭṭhānā. Dve khandhā no cittasaṁsaṭṭhasamuṭṭhānā. Tayo khandhā cittasaṁsaṭṭhasamuṭṭhānasahabhuno. Dve khandhā no cittasaṁsaṭṭhasamuṭṭhānasahabhuno. Tayo khandhā cittasaṁsaṭṭhasamuṭṭhānānuparivattino. Dve khandhā no cittasaṁsaṭṭhasamuṭṭhānānuparivattino. Viññāṇakkhandho ajjhattiko. Tayo khandhā bāhirā. Rūpakkhandho siyā ajjhattiko, siyā bāhiro. 3.2.11. Upādānagocchaka