Duvidhena saññākkhandho— atthi saṁyojanasampayutto, atthi saṁyojanavippayutto. Tividhena saññākkhandho— atthi ācayagāmī, atthi apacayagāmī, atthi nevācayagāmināpacayagāmī …pe…. Evaṁ dasavidhena saññākkhandho. Ekavidhena saññākkhandho— phassasampayutto. Duvidhena saññākkhandho— atthi saṁyojanavippayuttasaṁyojaniyo, atthi saṁyojanavippayuttaasaṁyojaniyo. Tividhena saññākkhandho— atthi sekkho, atthi asekkho, atthi nevasekkhanāsekkho …pe…. Evaṁ dasavidhena saññākkhandho. Ekavidhena saññākkhandho— phassasampayutto. Duvidhena saññākkhandho— atthi ganthaniyo, atthi aganthaniyo. Tividhena saññākkhandho— atthi paritto, atthi mahaggato, atthi appamāṇo …pe…. Evaṁ dasavidhena saññākkhandho. Ekavidhena saññākkhandho— phassasampayutto. Duvidhena saññākkhandho— atthi ganthasampayutto, atthi ganthavippayutto. Tividhena saññākkhandho— atthi parittārammaṇo, atthi mahaggatārammaṇo, atthi appamāṇārammaṇo …pe…. Evaṁ dasavidhena saññākkhandho. Ekavidhena saññākkhandho— phassasampayutto. Duvidhena saññākkhandho— atthi ganthavippayuttaganthaniyo, atthi ganthavippayuttaaganthaniyo. Tividhena saññākkhandho— atthi hīno, atthi majjhimo, atthi paṇīto …pe…. Evaṁ dasavidhena saññākkhandho. Ekavidhena saññākkhandho— phassasampayutto. Duvidhena saññākkhandho— atthi oghaniyo, atthi anoghaniyo.