Ekavidhena viññāṇakkhandho— phassasampayutto. Duvidhena viññāṇakkhandho— atthi nīvaraṇiyo, atthi anīvaraṇiyo. Tividhena viññāṇakkhandho— atthi ajjhattārammaṇo, atthi bahiddhārammaṇo, atthi ajjhattabahiddhārammaṇo …pe…. Evaṁ dasavidhena viññāṇakkhandho. Ubhatovaḍḍhakaṁ. Sattavidhena viññāṇakkhandho— atthi kusalo, atthi akusalo, atthi abyākato, atthi kāmāvacaro, atthi rūpāvacaro, atthi arūpāvacaro, atthi apariyāpanno. Evaṁ sattavidhena viññāṇakkhandho. Aparopi sattavidhena viññāṇakkhandho— atthi sukhāya vedanāya sampayutto, atthi dukkhāya vedanāya sampayutto, atthi adukkhamasukhāya vedanāya sampayutto, atthi kāmāvacaro, atthi rūpāvacaro, atthi arūpāvacaro, atthi apariyāpanno …pe… atthi ajjhattārammaṇo, atthi bahiddhārammaṇo, atthi ajjhattabahiddhārammaṇo, atthi kāmāvacaro, atthi rūpāvacaro, atthi arūpāvacaro, atthi apariyāpanno. Evaṁ sattavidhena viññāṇakkhandho.