Passaddhakāyassa sukhino cittaṁ samādhiyati— ayaṁ vuccati “samādhisambojjhaṅgo”. So tathā samāhitaṁ cittaṁ sādhukaṁ ajjhupekkhitā hoti— ayaṁ vuccati “upekkhāsambojjhaṅgo”. Satta bojjhaṅgā— satisambojjhaṅgo, dhammavicayasambojjhaṅgo, vīriyasambojjhaṅgo, pītisambojjhaṅgo, passaddhisambojjhaṅgo, samādhisambojjhaṅgo, upekkhāsambojjhaṅgo. Tattha katamo satisambojjhaṅgo? Atthi ajjhattaṁ dhammesu sati, atthi bahiddhā dhammesu sati. Yadapi ajjhattaṁ dhammesu sati tadapi satisambojjhaṅgo abhiññāya sambodhāya nibbānāya saṁvattati. Yadapi bahiddhā dhammesu sati tadapi satisambojjhaṅgo abhiññāya sambodhāya nibbānāya saṁvattati. Tattha katamo dhammavicayasambojjhaṅgo? Atthi ajjhattaṁ dhammesu pavicayo, atthi bahiddhā dhammesu pavicayo. Yadapi ajjhattaṁ dhammesu pavicayo tadapi dhammavicayasambojjhaṅgo abhiññāya sambodhāya nibbānāya saṁvattati. Yadapi bahiddhā dhammesu pavicayo tadapi dhammavicayasambojjhaṅgo abhiññāya sambodhāya nibbānāya saṁvattati.