Tena kho pana samayena aññatarā bhikkhunī gilānā hoti, na sakkoti padasā gantuṁ. Bhagavato etamatthaṁ ārocesuṁ. “Anujānāmi, bhikkhave, gilānāya yānan”ti. Atha kho bhikkhunīnaṁ etadahosi— “itthiyuttaṁ nu kho, purisayuttaṁ nu kho”ti? Bhagavato etamatthaṁ ārocesuṁ. “Anujānāmi, bhikkhave, itthiyuttaṁ purisayuttaṁ hatthavaṭṭakan”ti. Tena kho pana samayena aññatarissā bhikkhuniyā yānugghātena bāḷhataraṁ aphāsu ahosi. Bhagavato etamatthaṁ ārocesuṁ. “Anujānāmi, bhikkhave, sivikaṁ pāṭaṅkin”ti. Tena kho pana samayena aḍḍhakāsī gaṇikā bhikkhunīsu pabbajitā hoti. Sā ca sāvatthiṁ gantukāmā hoti— “bhagavato santike upasampajjissāmī”ti. Assosuṁ kho dhuttā— “aḍḍhakāsī kira gaṇikā sāvatthiṁ gantukāmā”ti. Te magge pariyuṭṭhiṁsu. Assosi kho aḍḍhakāsī gaṇikā— “dhuttā kira magge pariyuṭṭhitā”ti. Bhagavato santike dūtaṁ pāhesi— “ahañhi upasampajjitukāmā; kathaṁ nu kho mayā paṭipajjitabban”ti? Atha kho bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi— “anujānāmi, bhikkhave, dūtenapi upasampādetun”ti.