Te jotayanti saddhammaṁ, bhāsayanti pabhaṅkarā; Ālokakaraṇā dhīrā, cakkhumanto raṇañjahā. Yesaṁ ve sāsanaṁ sutvā, sammadaññāya paṇḍitā; Jātikkhayamabhiññāya, nāgacchanti punabbhavan”ti. Ayampi attho vutto bhagavatā, iti me sutanti. Pañcamaṁ. Taṇhuppādasutta Vuttañhetaṁ bhagavatā vuttamarahatāti me sutaṁ: “Cattārome, bhikkhave, taṇhuppādā, yattha bhikkhuno taṇhā uppajjamānā uppajjati. Katame cattāro? Cīvarahetu vā, bhikkhave, bhikkhuno taṇhā uppajjamānā uppajjati; piṇḍapātahetu vā, bhikkhave, bhikkhuno taṇhā uppajjamānā uppajjati; senāsanahetu vā, bhikkhave, bhikkhuno taṇhā uppajjamānā uppajjati; itibhavābhavahetu vā, bhikkhave, bhikkhuno taṇhā uppajjamānā uppajjati. Ime kho, bhikkhave, cattāro taṇhuppādā yattha bhikkhuno taṇhā uppajjamānā uppajjatī”ti. Etamatthaṁ bhagavā avoca. Tatthetaṁ iti vuccati: “Taṇhādutiyo puriso, dīghamaddhāna saṁsaraṁ; Itthabhāvaññathābhāvaṁ, saṁsaraṁ nātivattati. Etamādīnavaṁ ñatvā, taṇhaṁ dukkhassa sambhavaṁ; Vītataṇho anādāno, sato bhikkhu paribbaje”ti. Ayampi attho vutto bhagavatā, iti me sutanti. Chaṭṭhaṁ. Sabrahmakasutta Vuttañhetaṁ bhagavatā vuttamarahatāti me sutaṁ:
