Jānaṁ sabhikkhukaṁ ārāmaṁ anāpucchā pavisantī dve āpattiyo āpajjati. Paṭhamaṁ pādaṁ parikkhepaṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa. Bhikkhuṁ akkosantī paribhāsantī dve āpattiyo āpajjati. Akkosati, payoge dukkaṭaṁ; akkosite, āpatti pācittiyassa. Caṇḍīkatā gaṇaṁ paribhāsantī dve āpattiyo āpajjati. Paribhāsati, payoge dukkaṭaṁ; paribhāsite, āpatti pācittiyassa. Nimantitā vā pavāritā vā khādanīyaṁ vā bhojanīyaṁ vā bhuñjantī dve āpattiyo āpajjati. “Khādissāmi bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa. Kulaṁ maccharāyantī dve āpattiyo āpajjati. Maccharāyati, payoge dukkaṭaṁ; maccharite, āpatti pācittiyassa. Abhikkhuke āvāse vassaṁ vasantī dve āpattiyo āpajjati. “Vassaṁ vasissāmī”ti senāsanaṁ paññapeti pānīyaṁ paribhojanīyaṁ upaṭṭhapeti pariveṇaṁ sammajjati, āpatti dukkaṭassa; saha aruṇuggamanā āpatti pācittiyassa. Vassaṁvuṭṭhā bhikkhunī ubhatosaṅghe tīhi ṭhānehi na pavārentī ekaṁ āpattiṁ āpajjati. Pācittiyaṁ. Ovādāya vā saṁvāsāya vā na gacchantī ekaṁ āpattiṁ āpajjati. Pācittiyaṁ.