Bhikkhuṁ—“ehāvuso, gāmaṁ vā nigamaṁ vā piṇḍāya pavisissāmā”ti tassa dāpetvā vā adāpetvā vā uyyojento dve āpattiyo āpajjati. Uyyojeti, payoge dukkaṭaṁ; uyyojite āpatti pācittiyassa. Sabhojane kule anupakhajja nisajjaṁ kappento dve āpattiyo āpajjati. Nisīdati, payoge dukkaṭaṁ; nisinne āpatti pācittiyassa. Mātugāmena saddhiṁ raho paṭicchanne āsane nisajjaṁ kappento dve āpattiyo āpajjati. Nisīdati, payoge dukkaṭaṁ; nisinne āpatti pācittiyassa. Mātugāmena saddhiṁ eko ekāya raho nisajjaṁ kappento dve āpattiyo āpajjati. Nisīdati, payoge dukkaṭaṁ; nisinne āpatti pācittiyassa. Nimantito sabhatto samāno purebhattaṁ pacchābhattaṁ kulesu cārittaṁ āpajjanto dve āpattiyo āpajjati. Paṭhamaṁ pādaṁ ummāraṁ atikkāmeti, āpatti dukkaṭassa; dutiyaṁ pādaṁ atikkāmeti, āpatti pācittiyassa. Tatuttari bhesajjaṁ viññāpento dve āpattiyo āpajjati. Viññāpeti, payoge dukkaṭaṁ; viññāpite āpatti pācittiyassa.