Pāṇātipāte kati āpattiyo, Vācā pārājikā kati; Obhāsanā kati vuttā, Sañcarittena vā kati. Pāṇātipāte tisso āpattiyo, Vācā pārājikā tayo; Obhāsanā tayo vuttā, Sañcarittena vā tayo. Kati puggalā na upasampādetabbā, Kati kammānaṁ saṅgahā; Nāsitakā kati vuttā, Katinaṁ ekavācikā. Tayo puggalā na upasampādetabbā, Tayo kammānaṁ saṅgahā; Nāsitakā tayo vuttā, Tiṇṇannaṁ ekavācikā. Adinnādāne kati āpattiyo, Kati methunapaccayā; Chindantassa kati āpattiyo, Kati chaḍḍitapaccayā. Adinnādāne tisso āpattiyo, Catasso methunapaccayā; Chindantassa tisso āpattiyo, Pañca chaḍḍitapaccayā. Bhikkhunovādakavaggasmiṁ, pācittiyena dukkaṭā; Katettha navakā vuttā, katinaṁ cīvarena ca. Bhikkhunovādakavaggasmiṁ, Pācittiyena dukkaṭā katā; Caturettha navakā vuttā, Dvinnaṁ cīvarena ca. Bhikkhunīnañca akkhātā, Pāṭidesaniyā kati; Bhuñjantāmakadhaññena, Pācittiyena dukkaṭā kati. Bhikkhunīnañca akkhātā, Aṭṭha pāṭidesanīyā katā; Bhuñjantāmakadhaññena, Pācittiyena dukkaṭā katā.