Anādariyaṁ paṭicca uccāsaddaṁ mahāsaddaṁ karontena antaraghare nisīdantassa dukkaṭaṁ kattha paññattanti? Sāvatthiyaṁ paññattaṁ. Kaṁ ārabbhāti? Chabbaggiye bhikkhū ārabbha. Kismiṁ vatthusminti? Chabbaggiyā bhikkhū uccāsaddaṁ mahāsaddaṁ karontā antaraghare nisīdiṁsu, tasmiṁ vatthusmiṁ. Ekā paññatti. Channaṁ āpattisamuṭṭhānānaṁ ekena samuṭṭhānena samuṭṭhāti— kāyato ca vācato ca cittato ca samuṭṭhāti …pe…. Anādariyaṁ paṭicca kāyappacālakaṁ antaraghare gacchantassa dukkaṭaṁ …pe… ekā paññatti. Ekena samuṭṭhānena samuṭṭhāti— kāyato ca cittato ca samuṭṭhāti, na vācato …pe…. Anādariyaṁ paṭicca kāyappacālakaṁ antaraghare nisīdantassa dukkaṭaṁ …pe… ekā paññatti. Ekena samuṭṭhānena samuṭṭhāti— kāyato ca cittato ca samuṭṭhāti, na vācato …pe…. Anādariyaṁ paṭicca bāhuppacālakaṁ antaraghare gacchantassa dukkaṭaṁ …pe… ekā paññatti. Ekena samuṭṭhānena samuṭṭhāti— kāyato ca cittato ca samuṭṭhāti, na vācato …pe…. Anādariyaṁ paṭicca bāhuppacālakaṁ antaraghare nisīdantassa dukkaṭaṁ …pe… ekā paññatti. Ekena samuṭṭhānena samuṭṭhāti— kāyato ca cittato ca samuṭṭhāti, na vācato …pe…. Anādariyaṁ paṭicca sīsappacālakaṁ antaraghare gacchantassa dukkaṭaṁ …pe… ekā paññatti. Ekena samuṭṭhānena samuṭṭhāti— kāyato ca cittato ca samuṭṭhāti, na vācato …pe….