Attādānavaggo niṭṭhito pañcamo. Tassuddānaṁ Parisuddhañca kālena, Kāruññaṁ okāsena ca; Attādānaṁ adhikaraṇaṁ, Aparehipi vatthuñca; Suttaṁ dhammaṁ puna vatthuñca, Āpatti adhikaraṇena cāti.
6. Dhutaṅgavagga
“Kati nu kho, bhante, āraññikā”ti? “Pañcime, upāli, āraññikā. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṁ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya, sallekhaññeva nissāya pavivekaññeva nissāya idamatthitaññeva nissāya āraññiko hoti— ime kho, upāli, pañca āraññikā”ti.