Pañca bījajātāni— mūlabījaṁ, khandhabījaṁ, phaḷubījaṁ, aggabījaṁ, bījabījaññeva pañcamaṁ. Pañcahi samaṇakappehi phalaṁ paribhuñjitabbaṁ— aggiparijitaṁ, satthaparijitaṁ, nakhaparijitaṁ, abījaṁ, nibbattabījaññeva pañcamaṁ. Pañca visuddhiyo— nidānaṁ uddisitvā avasesaṁ sutena sāvetabbaṁ, ayaṁ paṭhamā visuddhi; nidānaṁ uddisitvā cattāri pārājikāni uddisitvā avasesaṁ sutena sāvetabbaṁ, ayaṁ dutiyā visuddhi; nidānaṁ uddisitvā cattāri pārājikāni uddisitvā terasa saṅghādisese uddisitvā avasesaṁ sutena sāvetabbaṁ, ayaṁ tatiyā visuddhi; nidānaṁ uddisitvā cattāri pārājikāni uddisitvā terasa saṅghādisese uddisitvā dve aniyate uddisitvā avasesaṁ sutena sāvetabbaṁ, ayaṁ catutthā visuddhi; vitthāreneva pañcamī. Aparāpi pañca visuddhiyo— suttuddeso, pārisuddhiuposatho, adhiṭṭhānuposatho, pavāraṇā, sāmaggīuposathoyeva pañcamo. Pañcānisaṁsā vinayadhare— attano sīlakkhandho sugutto hoti surakkhito, kukkuccapakatānaṁ paṭisaraṇaṁ hoti, visārado saṅghamajjhe voharati, paccatthike sahadhammena suniggahitaṁ niggaṇhāti, saddhammaṭṭhitiyā paṭipanno hoti. Pañca adhammikāni pātimokkhaṭṭhapanāni. Pañca dhammikāni pātimokkhaṭṭhapanānīti. Pañcakaṁ niṭṭhitaṁ. Tassuddānaṁ Āpatti āpattikkhandhā, vinītānantarena ca; Puggalā chedanā ceva, āpajjati ca paccayā. Na upeti upeti ca, kappantusaṅkitelañca; Vasaṁ byasanā sampadā, passaddhi puggalena ca. Sosānikaṁ khāyitañca, theyyaṁ coro ca vuccati; Avissajji avebhaṅgi, kāyato kāyavācato. Desanā saṅghaṁ uddesaṁ, paccantikathinena ca; Kammāni yāvatatiyaṁ, pārājithulladukkaṭaṁ. Akappiyaṁ kappiyañca, apuññaduvinodayā; Sammajjanī apare ca, bhāsaṁ āpattimeva ca. Adhikaraṇaṁ vatthu ñatti, āpattā ubhayāni ca; Lahukaṭṭhamakā ete, kaṇhasukkā vijānatha. Araññaṁ piṇḍapātañca, paṁsurukkhasusānikā; Abbhokāso cīvarañca, sapadāno nisajjiko.