Uyyuttaṁ senaṁ dassanāya gacchanto dve āpattiyo āpajjati. Gacchati, āpatti dukkaṭassa; yattha ṭhito passati, āpatti pācittiyassa. Atirekatirattaṁ senāya vasanto dve āpattiyo āpajjati. Vasati, payoge dukkaṭaṁ; vasite āpatti pācittiyassa. Uyyodhikaṁ gacchanto dve āpattiyo āpajjati. Gacchati, āpatti dukkaṭassa; yattha ṭhito passati, āpatti pācittiyassa. Acelakavaggo pañcamo. 5.6. Surāmerayavagga Majjaṁ pivanto dve āpattiyo āpajjati. “Pivissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa. Bhikkhuṁ aṅgulipatodakena hāsento dve āpattiyo āpajjati. Hāseti, payoge dukkaṭaṁ; hasite āpatti pācittiyassa. Udake kīḷanto dve āpattiyo āpajjati. Heṭṭhāgopphake udake kīḷati, āpatti dukkaṭassa; uparigopphake kīḷati, āpatti pācittiyassa. Anādariyaṁ karonto dve āpattiyo āpajjati. Karoti, payoge dukkaṭaṁ; kate āpatti pācittiyassa. Bhikkhuṁ bhiṁsāpento dve āpattiyo āpajjati. Bhiṁsāpeti, payoge dukkaṭaṁ; bhiṁsāpite āpatti pācittiyassa.