Savanantiko kathinuddhāro, Vutto ādiccabandhunā; Etañca tāhaṁ pucchāmi, Katamo palibodho paṭhamaṁ chijjati. Savanantiko kathinuddhāro, Vutto ādiccabandhunā; Etañca tāhaṁ vissajjissaṁ, Cīvarapalibodho paṭhamaṁ chijjati; Tassa saha savanena, Āvāsapalibodho chijjati. Āsāvacchediko kathinuddhāro, Vutto ādiccabandhunā; Etañca tāhaṁ pucchāmi, Katamo palibodho paṭhamaṁ chijjati. Āsāvacchediko kathinuddhāro, Vutto ādiccabandhunā; Etañca tāhaṁ vissajjissaṁ, Āvāsapalibodho paṭhamaṁ chijjati; Cīvarāsāya upacchinnāya cīvarapalibodho chijjati.