Dadhiṁ viññāpetvā bhuñjantiyā āpattiyo channaṁ āpattisamuṭṭhānānaṁ katihi samuṭṭhānehi samuṭṭhanti? Dadhiṁ viññāpetvā bhuñjantiyā āpattiyo channaṁ āpattisamuṭṭhānānaṁ catūhi samuṭṭhānehi samuṭṭhanti— siyā kāyato samuṭṭhanti, na vācato na cittato; siyā kāyato ca vācato ca samuṭṭhanti, na cittato; siyā kāyato ca cittato ca samuṭṭhanti, na vācato; siyā kāyato ca vācato ca cittato ca samuṭṭhanti. Samuṭṭhānavāro niṭṭhito pañcamo. Bhikkhunivibhaṅga Paṭhamabhāga 2.6 Adhikaraṇavāra Avassutāya bhikkhuniyā avassutassa purisapuggalassa kāyasaṁsaggaṁ sādiyantiyā āpattiyo catunnaṁ adhikaraṇānaṁ katamaṁ adhikaraṇaṁ? Avassutāya bhikkhuniyā avassutassa purisapuggalassa kāyasaṁsaggaṁ sādiyantiyā āpattiyo catunnaṁ adhikaraṇānaṁ—āpattādhikaraṇaṁ …pe…. Dadhiṁ viññāpetvā bhuñjantiyā āpattiyo catunnaṁ adhikaraṇānaṁ katamaṁ adhikaraṇaṁ? Dadhiṁ viññāpetvā bhuñjantiyā āpattiyo catunnaṁ adhikaraṇānaṁ—āpattādhikaraṇaṁ. Adhikaraṇavāro niṭṭhito chaṭṭho. Bhikkhunivibhaṅga Paṭhamabhāga 2.7 Samathavāra Avassutāya bhikkhuniyā avassutassa purisapuggalassa kāyasaṁsaggaṁ sādiyantiyā āpattiyo sattannaṁ samathānaṁ katihi samathehi sammanti? Avassutāya bhikkhuniyā avassutassa purisapuggalassa kāyasaṁsaggaṁ sādiyantiyā āpattiyo sattannaṁ samathānaṁ tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca …pe….