Sugatacīvarappamāṇaṁ cīvaraṁ kārāpentassa pācittiyaṁ kattha paññattanti? Sāvatthiyaṁ paññattaṁ. Kaṁ ārabbhāti? Āyasmantaṁ nandaṁ ārabbha. Kismiṁ vatthusminti? Āyasmā nando sugatacīvarappamāṇaṁ cīvaraṁ dhāresi, tasmiṁ vatthusmiṁ. Ekā paññatti. Channaṁ āpattisamuṭṭhānānaṁ chahi samuṭṭhānehi samuṭṭhāti …pe…. Rājavaggo navamo. Dvenavuti pācittiyā niṭṭhitā. Khuddakaṁ samattaṁ. Tassuddānaṁ Musā omasapesuññaṁ, padaseyyā ca itthiyā; Aññatra viññunā bhūtā, duṭṭhullāpatti khaṇanā. Bhūtaṁ aññāya ujjhāyi, mañco seyyo ca vuccati; Pubbe nikkaḍḍhanāhacca, dvāraṁ sappāṇakena ca. Asammatā atthaṅgate, upassayāmisena ca; Dade sibbe vidhānena, nāvā bhuñjeyya ekato. Piṇḍaṁ gaṇaṁ paraṁ pūvaṁ, pavārito pavāritaṁ; Vikālaṁ sannidhi khīraṁ, dantaponena te dasa. Acelakaṁ uyyokhajja, paṭicchannaṁ rahena ca; Nimantito paccayehi, senāvasanuyyodhikaṁ. Surā aṅguli hāso ca, anādariyañca bhiṁsanaṁ; Joti nahāna dubbaṇṇaṁ, sāmaṁ apanidhena ca. Sañciccudakakammā ca, duṭṭhullaṁ ūnavīsati; Theyyaitthiavadesaṁ, saṁvāse nāsitena ca. Sahadhammikavilekhā, moho pahārenuggire; Amūlakañca sañcicca, sossāmi khiyyapakkame. Saṅghena cīvaraṁ datvā, pariṇāmeyya puggale; Raññañca ratanaṁ santaṁ, sūci mañco ca tūlikā; Nisīdanaṁ kaṇḍucchādi, vassikā sugatena cāti. Tesaṁ vaggānaṁ uddānaṁ Musā bhūtā ca ovādo, bhojanācelakena ca; Surā sappāṇakā dhammo, rājavaggena te navāti.

6. Pāṭidesanīyakaṇḍa