Bhikkhunupassayaṁ upasaṅkamitvā bhikkhuniyo ovadanto dve āpattiyo āpajjati. Ovadati, payoge dukkaṭaṁ; ovadite āpatti pācittiyassa. “Āmisahetu bhikkhū bhikkhuniyo ovadantī”ti bhaṇanto dve āpattiyo āpajjati. Bhaṇati, payoge dukkaṭaṁ; bhaṇite āpatti pācittiyassa. Aññātikāya bhikkhuniyā cīvaraṁ dento dve āpattiyo āpajjati. Deti, payoge dukkaṭaṁ; dinne āpatti pācittiyassa. Aññātikāya bhikkhuniyā cīvaraṁ sibbento dve āpattiyo āpajjati. Sibbeti, payoge dukkaṭaṁ; ārāpathe ārāpathe āpatti pācittiyassa. Bhikkhuniyā saddhiṁ saṁvidhāya ekaddhānamaggaṁ paṭipajjanto dve āpattiyo āpajjati. Paṭipajjati, payoge dukkaṭaṁ; paṭipanne āpatti pācittiyassa. Bhikkhuniyā saddhiṁ saṁvidhāya ekaṁ nāvaṁ abhiruhanto dve āpattiyo āpajjati. Abhiruhati, payoge dukkaṭaṁ; abhiruḷhe āpatti pācittiyassa. Jānaṁ bhikkhuniparipācitaṁ piṇḍapātaṁ bhuñjanto dve āpattiyo āpajjati. “Bhuñjissāmī”ti paṭiggaṇhāti, āpatti dukkaṭassa; ajjhohāre ajjhohāre āpatti pācittiyassa.