“Pañcime, upāli, bhojanā. Katame pañca? Odano, kummāso, sattu, maccho, maṁsaṁ— ime kho, upāli, pañca bhojanā”ti. Diṭṭhāvikammavaggo niṭṭhito catuttho. Tassuddānaṁ Diṭṭhāvikammā apare, paṭiggahānatirittā; Pavāraṇā paṭiññātaṁ, okāsaṁ sākacchena ca; Pañhaṁ aññabyākaraṇā, visuddhi cāpi bhojanāti.

5. Attādānavagga

“Codakena, bhante, bhikkhunā paraṁ codetukāmena kati dhamme ajjhattaṁ paccavekkhitvā paro codetabbo”ti? “Codakenupāli, bhikkhunā paraṁ codetukāmena pañca dhamme ajjhattaṁ paccavekkhitvā paro codetabbo. Katame pañca? Codakenupāli, bhikkhunā paraṁ codetukāmena evaṁ paccavekkhitabbaṁ— ‘Parisuddhakāyasamācāro nu khomhi, parisuddhenamhi kāyasamācārena samannāgato acchiddena appaṭimaṁsena, saṁvijjati nu kho me eso dhammo udāhu no’ti. No ce, upāli, bhikkhu parisuddhakāyasamācāro hoti, parisuddhena kāyasamācārena samannāgato acchiddena appaṭimaṁsena, tassa bhavanti vattāro— ‘iṅgha tāva āyasmā kāyikaṁ sikkhassū’ti itissa bhavanti vattāro.