Mātugāmena saddhiṁ eko ekāya raho nisajjaṁ kappentassa pācittiyaṁ kattha paññattanti? Sāvatthiyaṁ paññattaṁ. Kaṁ ārabbhāti? Āyasmantaṁ upanandaṁ sakyaputtaṁ ārabbha. Kismiṁ vatthusminti? Āyasmā upanando sakyaputto mātugāmena saddhiṁ eko ekāya raho nisajjaṁ kappesi, tasmiṁ vatthusmiṁ. Ekā paññatti. Channaṁ āpattisamuṭṭhānānaṁ ekena samuṭṭhānena samuṭṭhāti— kāyato ca cittato ca samuṭṭhāti, na vācato …pe…. Nimantitena sabhattena santaṁ bhikkhuṁ anāpucchā purebhattaṁ pacchābhattaṁ kulesu cārittaṁ āpajjantassa pācittiyaṁ kattha paññattanti? Rājagahe paññattaṁ. Kaṁ ārabbhāti? Āyasmantaṁ upanandaṁ sakyaputtaṁ ārabbha. Kismiṁ vatthusminti? Āyasmā upanando sakyaputto nimantito sabhatto samāno purebhattaṁ pacchābhattaṁ kulesu cārittaṁ āpajji, tasmiṁ vatthusmiṁ. Ekā paññatti, catasso anupaññattiyo. Channaṁ āpattisamuṭṭhānānaṁ dvīhi samuṭṭhānehi samuṭṭhāti kathinake …pe…. Tatuttari bhesajjaṁ viññāpentassa pācittiyaṁ kattha paññattanti? Sakkesu paññattaṁ. Kaṁ ārabbhāti? Chabbaggiye bhikkhū ārabbha. Kismiṁ vatthusminti? Chabbaggiyā bhikkhū mahānāmena sakkena “ajjaṇho, bhante, āgamethā”ti vuccamānā nāgamesuṁ, tasmiṁ vatthusmiṁ. Ekā paññatti. Channaṁ āpattisamuṭṭhānānaṁ chahi samuṭṭhānehi samuṭṭhāti …pe….