Adhikaraṇanti vā samathāti vā ime dhammā saṁsaṭṭhā udāhu visaṁsaṭṭhā? Labbhā ca panimesaṁ dhammānaṁ vinibbhujitvā vinibbhujitvā nānākaraṇaṁ paññāpetunti? Adhikaraṇanti vā samathāti vā ime dhammā visaṁsaṭṭhā, no saṁsaṭṭhā. Labbhā ca panimesaṁ dhammānaṁ vinibbhujitvā vinibbhujitvā nānākaraṇaṁ paññāpetunti. So—“mā hevan”tissa vacanīyo. Adhikaraṇanti vā samathāti vā ime dhammā saṁsaṭṭhā, no visaṁsaṭṭhā. No ca labbhā imesaṁ dhammānaṁ vinibbhujitvā vinibbhujitvā nānākaraṇaṁ paññāpetuṁ. Taṁ kissa hetu? Nanu vuttaṁ bhagavatā— “cattārimāni, bhikkhave, adhikaraṇāni, satta samathā. Adhikaraṇā samathehi sammanti, samathā adhikaraṇehi sammanti. Evaṁ, ime dhammā saṁsaṭṭhā no visaṁsaṭṭhā; no ca labbhā imesaṁ dhammānaṁ vinibbhujitvā vinibbhujitvā nānākaraṇaṁ paññāpetun”ti. Saṁsaṭṭhavāro niṭṭhito soḷasamo.

12. Sammativāra

Vivādādhikaraṇaṁ katihi samathehi sammati? Anuvādādhikaraṇaṁ katihi samathehi sammati? Āpattādhikaraṇaṁ katihi samathehi sammati? Kiccādhikaraṇaṁ katihi samathehi sammati? Vivādādhikaraṇaṁ dvīhi samathehi sammati— sammukhāvinayena ca yebhuyyasikāya ca. Anuvādādhikaraṇaṁ catūhi samathehi sammati— sammukhāvinayena ca sativinayena ca amūḷhavinayena ca tassapāpiyasikāya ca.