กินฺนุ เต ติณกิจฺจตฺถิ ติณเมว ปภาสติ ฯ
[๖๔๓] อิธาคมา พฺรหฺมจารี พฺรหาฉตฺโต พหุสฺสุโต
โส เม สพฺพํ สมาทาย ติณํ นิกฺขิปฺป คจฺฉติ ฯ
[๖๔๔] เอเวตํ โหติ กตฺตพฺพํ อปฺเปน พหุมิจฺฉตา
สพฺพํ สกสฺส อาทานํ อนาทานํ ติณสฺส จ
ติณสฺส จาฏีสุ คโต ตตฺถ กา ปริเทวนา ๑ ฯ
[๖๔๕] สีลวนฺโต น กุพฺพนฺติ พาโล สีลานิ กุพฺพติ
อนิจฺจสีลํ ทุสฺสีลฺยํ ๒ กึ ปณฺฑิจฺจํ กริสฺสตีติ ฯ
พฺรหาฉตฺตชาตกํ ฉฏฺฐํ ฯ
____________
๗ ปีฐชาตกํ
[๖๔๖] น เต ปีฐมทาสิมฺห ๓ น ปานํ นปิ โภชนํ
พฺรหฺมจารี ขมสฺสุ เม เอตํ ปสฺสามิ อจฺจยํ ฯ
[๖๔๗] เนวาภิสชฺชามิ นจาปิ กุปฺเป
นจาปิ เม อปฺปิยมาสิ กิญฺจิ
อโถปิ เม อาสิ มโนวิตกฺโก
เอตาทิโส นูน กุลสฺส ธมฺโม ฯ
[๖๔๘] เอสสฺมากํ กุเล ธมฺโม ปิตุปิตามโห สทา
อาสนํ อุทกํ ปชฺชํ สพฺเพตํ นิปทามเส ฯ #๑ ม. อิทํ คาถาปาททฺวยํ น ทิสฺสติ ฯ ๒ ยุ. ทุสฺสีลํ ฯ ๓ ม. ปีฐมทายิมฺหา ฯ8