สุกฺขาย อโลณิกาย จ
ปสฺส ผลํ กุมฺมาสปิณฺฑิยา ฯ
หตฺถี ควาสฺสา จิเม พหู
ธนธญฺญา ปฐวี จ เกวลา
นาริโย จิมา อจฺฉรูปมา
ปสฺส ผลํ กุมฺมาสปิณฺฑิยา ฯ
[๑๑๐๘] อภิกฺขณํ ราชกุญฺชร
คาถา ภาสสิ โกสลาธิป
ปุจฺฉามิ ตํ รฏฺฐวฑฺฒน
พาฬฺหํ ปีติมโน ปภาสสิ ฯ
[๑๑๐๙] อิมสฺมึเยว นคเร กุเล อญฺญตเร อหุํ
ปรกมฺมกโร อาสึ ภตโก สีลสํวุโต ฯ
กมฺมาย นิกฺขมนฺตาหํ ๑ จตุโร สมณทฺทสํ
อาจารสีลสมฺปนฺเน สีติภูเต อนาสเว ฯ
เตสุ จิตฺตํ ปสาเทตฺวา นิสีเทตฺวา ปณฺณสนฺถเต
อทํ พุทฺธาน กุมฺมาสํ ปสนฺโน เสหิ ปาณิภิ ฯ
ตสฺส กมฺมสฺส กุสลสฺส อิทํ เม เอทิสํ ผลํ
อนุโภมิ อิทํ รชฺชํ ผีตํ ธรณิมุตฺตมํ ฯ
[๑๑๑๐] ททํ ภุญฺช จ มา จ ปมาโท
จกฺกํ วตฺตย โกสลาธิป
#๑ ม. นิกฺขมนฺโตหํ ฯ