๓ เวริชาตกํ
[๑๐๓] ยตฺถ เวรึ นิวึสติ ๑ น วเส ตตฺถ ปณฺฑิโต
เอกรตฺตํ ทฺวิรตฺตํ วา ทุกฺขํ วสติ เวริสูติ ฯ
เวริชาตกํ ตติยํ ฯ
___________
๔ มิตฺตวินฺทชาตกํ ๒
[๑๐๔] จตุพฺภิ อฏฺฐชฺฌคมา อฏฺฐาภิปิ จ โสฬส
โสฬสาภิ จ พตฺตึส อตฺริจฺฉํ จกฺกมาสโท
อิจฺฉาหตสฺส โปสสฺส จกฺกํ ภมติ มตฺถเกติ ฯ
มิตฺตวินฺทชาตกํ จตุตฺถํ ฯ
___________
๕ ทุพฺพลกฏฺฐชาตกํ
[๑๐๕] พหุมฺเปตํ วเน กฏฺฐํ วาโต ภญฺชติ ทุพฺพลํ
ตสฺส เจ ภายสิ นาค กีโส นูน ภวิสฺสสีติ ฯ
ทุพฺพลกฏฺฐชาตกํ ปญฺจมํ ฯ
____________
๖ อุทญฺจนีชาตกํ
[๑๐๖] สุขํ วต มํ ชีวนฺตํ ปจมานา อุทญฺจนี
โจรี ชายปฺปวาเทน เตลํ โลณญฺจ ยาจตีติ ฯ
อุทญฺจนีชาตกํ ฉฏฺฐํ ฯ
#๑ ม. นิวิสติ ฯ ๒ ม. มิตฺตวินฺทกชาตกํ ฯ