Anādariyaṁ paṭicca uppathena gacchanto pathena gacchantassa dhammaṁ desento ekaṁ āpattiṁ āpajjati. Dukkaṭaṁ. Anādariyaṁ paṭicca ṭhito uccāraṁ vā passāvaṁ vā karonto ekaṁ āpattiṁ āpajjati. Dukkaṭaṁ. Anādariyaṁ paṭicca harite uccāraṁ vā passāvaṁ vā kheḷaṁ vā karonto ekaṁ āpattiṁ āpajjati. Dukkaṭaṁ. Anādariyaṁ paṭicca udake uccāraṁ vā passāvaṁ vā kheḷaṁ vā karonto kati āpattiyo āpajjati? Anādariyaṁ paṭicca udake uccāraṁ vā passāvaṁ vā kheḷaṁ vā karonto ekaṁ āpattiṁ āpajjati. Dukkaṭaṁ— anādariyaṁ paṭicca udake uccāraṁ vā passāvaṁ vā kheḷaṁ vā karonto imaṁ ekaṁ āpattiṁ āpajjati. Pādukavaggo sattamo. Sekhiyā niṭṭhitā. Katāpattivāro niṭṭhito dutiyo. Bhikkhuvibhaṅga Paṭhamabhāga 1.3 Vipattivāra Methunaṁ dhammaṁ paṭisevantassa āpattiyo catunnaṁ vipattīnaṁ kati vipattiyo bhajanti? Methunaṁ dhammaṁ paṭisevantassa āpattiyo catunnaṁ vipattīnaṁ dve vipattiyo bhajanti— siyā sīlavipattiṁ, siyā ācāravipattiṁ …pe….
