Anādariyaṁ paṭicca udake uccāraṁ vā passāvaṁ vā kheḷaṁ vā karontassa āpatti channaṁ āpattisamuṭṭhānānaṁ katihi samuṭṭhānehi samuṭṭhāti? Anādariyaṁ paṭicca udake uccāraṁ vā passāvaṁ vā kheḷaṁ vā karontassa āpatti channaṁ āpattisamuṭṭhānānaṁ ekena samuṭṭhānena samuṭṭhāti— kāyato ca cittato ca samuṭṭhāti, na vācato. Samuṭṭhānavāro niṭṭhito pañcamo. Bhikkhuvibhaṅga Paṭhamabhāga 1.6 Adhikaraṇavāra Methunaṁ dhammaṁ paṭisevantassa āpattiyo catunnaṁ adhikaraṇānaṁ katamaṁ adhikaraṇaṁ? Methunaṁ dhammaṁ paṭisevantassa āpattiyo catunnaṁ adhikaraṇānaṁ āpattādhikaraṇaṁ …pe…. Anādariyaṁ paṭicca udake uccāraṁ vā passāvaṁ vā kheḷaṁ vā karontassa āpatti catunnaṁ adhikaraṇānaṁ katamaṁ adhikaraṇaṁ? Anādariyaṁ paṭicca udake uccāraṁ vā passāvaṁ vā kheḷaṁ vā karontassa āpatti catunnaṁ adhikaraṇānaṁ āpattādhikaraṇaṁ. Adhikaraṇavāro niṭṭhito chaṭṭho. Bhikkhuvibhaṅga Paṭhamabhāga 1.7 Samathavāra Methunaṁ dhammaṁ paṭisevantassa āpattiyo sattannaṁ samathānaṁ katihi samathehi sammanti? Methunaṁ dhammaṁ paṭisevantassa āpattiyo sattannaṁ samathānaṁ tīhi samathehi sammanti— siyā sammukhāvinayena ca paṭiññātakaraṇena ca, siyā sammukhāvinayena ca tiṇavatthārakena ca …pe….
