Dadhiṁ viññāpetvā bhuñjanapaccayā kati āpattiyo āpajjati? Dadhiṁ viññāpetvā bhuñjanapaccayā dve āpattiyo āpajjati. Bhuñjissāmīti paṭiggaṇhāti, āpatti dukkaṭassa; ajjhohāre ajjhohāre āpatti pāṭidesanīyassa— dadhiṁ viññāpetvā bhuñjanapaccayā imā dve āpattiyo āpajjati. Katāpattivāro niṭṭhito dutiyo. Bhikkhunivibhaṅga Dutiyabhāga 2.11 Vipattivāra Kāyasaṁsaggaṁ sādiyanapaccayā āpattiyo catunnaṁ vipattīnaṁ kati vipattiyo bhajanti? Kāyasaṁsaggaṁ sādiyanapaccayā āpattiyo catunnaṁ vipattīnaṁ dve vipattiyo bhajanti— siyā sīlavipattiṁ, siyā ācāravipattiṁ …pe…. Dadhiṁ viññāpetvā bhuñjanapaccayā āpattiyo catunnaṁ vipattīnaṁ kati vipattiyo bhajanti? Dadhiṁ viññāpetvā bhuñjanapaccayā āpattiyo catunnaṁ vipattīnaṁ ekaṁ vipattiṁ bhajanti— ācāravipattiṁ. Vipattivāro niṭṭhito tatiyo. Bhikkhunivibhaṅga Dutiyabhāga 2.12 Saṅgahavāra Kāyasaṁsaggaṁ sādiyanapaccayā āpattiyo sattannaṁ āpattikkhandhānaṁ katihi āpattikkhandhehi saṅgahitā? Kāyasaṁsaggaṁ sādiyanapaccayā āpattiyo sattannaṁ āpattikkhandhānaṁ pañcahi āpattikkhandhehi saṅgahitā— siyā pārājikāpattikkhandhena, siyā saṅghādisesāpattikkhandhena, siyā thullaccayāpattikkhandhena, siyā pācittiyāpattikkhandhena, siyā dukkaṭāpattikkhandhena …pe….