[๔๘๐] ธิรตฺถุมํ อาตุรํ ปูติกายํ
ชิคุจฺฉิยํ อสุจึ พฺยาธิธมฺมํ
ยตฺถปฺปมตฺตา อธิมุจฺฉิตา ปชา
หาเปนฺติ มคฺคํ สุคตูปปตฺติยาติ ฯ
กายนิพฺพินฺทชาตกํ ตติยํ ฯ
___________
๔ ชมฺพูขาทกชาตกํ
[๔๘๑] โกยํ พินฺทุสฺสโร วคฺคุ สรวนฺตานมุตฺตโม
อจฺจุโต ชมฺพุสาขาย โมรจฺฉาโปว กุชฺชติ ฯ
[๔๘๒] กุลปุตฺโต ปชานาติ กุลปุตฺตํ ๑ ปสํสิตุํ
พฺยคฺฆจฺฉาปสทิสวณฺณ ภุญฺช สมฺม ททามิ เต ฯ
[๔๘๓] จิรสฺสํ วต ปสฺสามิ มุสาวาที สมาคเต
วนฺตาทํ กุณปาทญฺจ อญฺญมญฺญํ ปสํสเกติ ฯ
ชมฺพูขาทกชาตกํ จตุตฺถํ ฯ
___________๗
๕ อนฺตชาตกํ
[๔๘๔] อุสภสฺเสว เต ขนฺโธ สีหสฺเสว วิชมฺภิตํ
มิคราช นโม ตยตฺถุ อปิ กิญฺจิ ลภามเส ฯ
[๔๘๕] กุลปุตฺโต ปชานาติ กุลปุตฺตํ ๒ ปสํสิตุํ
มยูรคีวสงฺกาส อิโต ปริยาหิ วายส ฯ #๑-๒ สี. ยุ. กุลปุตฺเต ฯ